МОЛЕБНОЕ ПЕНИЕ
О страждущих недугом винопианства и наркомании

Иерей начинает: Благословен Бог наш:
Чтец: Царю Небесный: Трисвятое. Отче наш: Господи помилуй (12 раз) Слава, и ныне: Приидите, поклонимся…:
И псалом - 26:
Господь просвещение мое и спаситель мой, кого убоюся; Господь защититель живота моего, от кого устрашуся; внегда приближатися на мя злобующым, еже снести плоти моя, оскорбляющии мя, и врази мои, тии изнемогоша и падоша. Аще ополчится на мя полк, не убоится сердце мое: аще восстанет на мя брань, на Него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм святый Его. Яко скры мя в селении Своем в день зол моих, покры мя в тайне селения Своего, на камень вознесе мя. И ныне се вознесе главу мою, на враги моя: обыдох и пожрох в селении Его жертву хваления и воскликновения: пою и воспою Господеви. Услыши, Господи, глас мой, имже воззвах: помилуй мя и услыши мя. Тебе рече сердце мое: Господа взыщу, взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего: помощник мой буди, не отрини мене, и не остави мене, Боже Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем и настави мя на стезю правую враг моих ради. Не предаждь мене в душы стужающих ми: яко восташа на мя свидетеле неправеднии и солга неправда себе. Верую видети благая Господня на земли живых. Потерпи Господа, мужайся и да крепится сердце твое, и потерпи Господа.
Слава, и ныне: Аллилуйя, аллилуйя, аллилуйя, слава Тебе, Боже, (трижды.) 

Таже ектения:
- Миром Господу помолимся:
Лик: Господи помилуй.
- О свышнем мире:
Лик: Господи помилуй.
- О мире всего мира: И прочее…
- О еже низпослати на рабов Своих (ИМЯРЕК) духа премудрости и разума, всадити в сердца их страх Свой Божественный, отгнати буесть и просветити их ум, Господу помолимся.
- О еже призрети на рабов Своих (ИМЯРЕК), страждущих душею и телом, и разрешити их от уз смертоноснаго зелия, егоже ради связани суть и порабощени волею, да припадут к Богу в покаянии, и причастники благочестия будут, Господу помолимся.
- О еже посетити рабов Своих (ИМЯРЕК) посещением Святаго Своего Духа, и избавити их от недуга винопития и наркомании, в них гнездящася, Господу помолимся.
- Заступи, спаси, помилуй в сохрани нас, Боже, Твоею благодатию.
- Пресвятую, Пречистую, преблагословенную, славную владычицу нашу Богородицу и Приснодеву Марию, со всеми святыми помянувшее, сами себе и друг друга, и весь живот наш Христу Богу предадим.
Возглас: Яко подобает Тебе всякая слава честь и поклонение, Отцу и Сыну, и Святому Духу, ныне и присно, и во веки веков.
Лик: Аминь.
Бог Господь и явися нам…
Тропарь, глас 4:
Скорый в заступлении един сый, Христе, / скорое свыше покажи посещение страждущим рабом Твоим, / и избави от недуг и страстей, / и воздвигни их к жизни вечной в любви к Тебе, / приведи их ко спасительному воздержанию, / посети и направи их во еже петит я и славити непрестанно, // молитвами Богородицы, едине Человеколюбче.
Слава, и ныне, глас тойже:
Тропарь иконе Божия Матере, именуемыя Неупиваемая чаша:
Днесь притецем, вернии, / к Божественному и пречудному образу Пресвятые Богоматере, / напаяющия верных сердца / небесною неупиваемою чащею своего милосердия, / и людем верным чудеса показующия, / яже мы видяще и слышащее, духовно празднуем и тепле вопием: / Владычице премилостивая, / исцели наша недуги и страсти, / молящи Сына твоего, / Христа Бога нашего, // спасти души наша.
Запевы: Пресвятая Богородице спаси нас.
Слава Отцу и Сыну и Святому Духу
И ныне и присно и во веки веков аминь.
Хор: Спаси от бед рабы Твоя Богородице…
- Призри благосердием всепетая Богородице…
Ектиния: Паки и паки миром Господу помолимся…
Возглас: Ты бо еси царь мира…
Акафист Богородице
Прокимен, глас 4:
Там обо рука Твоя наставит мя, и удержит мя десница Твоя.
Стих: Яко ты создал еси утробы моя, восприял мя еси из чрева матере моея.
К коринфяном послания св. апостола Павла чтение (гл.3, 11 - 17)
Братие, основания бо инаго никтоже может положити паче лежащаго, еже есть Иисус Христос. Аще ли кто назидает на основании сем злато, сребро, камение честное: дрова, сено, тростие: Когождо дело явлено будет: день бо явит, зане огнем открывается: и когождо дело, яково же есть, огонь искусит. И егоже аще дело пребудет, еже назда, мзду приимет. А егоже дело сгорит, отщетится: сам же спасется, такожде яко же огнем. Не весте ли, яко храм Божий есте вы, и Дух Божий живет в вас? Аще кто Божий храм растлит, растлит сего Бог: храм бо Божий свят есть, иже есть вы.
Аллилуйя, глас 4:
Стих: Помощь моя от Господа, сотворшего небо и землю.
Стих: Изведи из темницы душу мою.
Евангелие от Матфея (зач.20 )
Рече Господь Своим учеником: просите и дастся вам, ищите и обрящете, толцыте и отверзется вам. Всяк бо просяй приемлет и ищай обретает и толкущему отверзется. Или кто есть от вас человек, его же аще воспросит сын его хлеба, егда камень подаст ему, или аще рыбы просит, егда змию подаст ему. Аще убо вы лукавы сущее, умеете даяния блага даяти чадом вашим, кольми паче Отец ваш небесный даст блага просящим у Него.
Запевы: Пресвятая Богородице спаси нас.
Слава Отцу и Сыну и Святому Духу
И ныне и присно и во веки веков аминь.
Хор: Спаси от бед рабы Твоя Богородице…
- Призри благосердием всепетая Богородице…
Достойно есть яко воистину блажити Тя Богородицу…
Кондак, гл.2:
На одре болезни лежащих и смертною раною уязвленных, яко же иногда воздвигл еси Спасе Петрову тещу и расслабленного на одре носимого, сице и ныне милосерде, страждущих посети и исцели, Ты бо един еси недуги и болезни рода нашего понесый, и вся могий яко многомилостив.
Слава, и ныне: Богородичен:
Не умолчим никогда Богородице, силя Твоя глаголати недостойнии, аще бо Ты не бы предстояла молящи, кто бы нас избавил от толиких бед, кто же бы сохранил до ныне свободны, не отступим Владычице от Тебе, Твоя бо рабы спасаеши присно от всяких лютых.
На сугубой ектении:
- Помилуй нас Боже по великой милости Твоей…
Свящ. или дьякон: Врачу душ и телес, со умилением в сердце сокрушенном к Тебе припадаем, и стеняше вопием Ти: исцели болезни, уврачуй страсти душ и телес рабов Твоих, отец, братий и сестер и детей наших тяжким недугом пианства и наркомании одержимых и избави их от духа нечистаго и злобнаго, потопляющего души и телеса их в зелий душерастлительнем и прости, яко Благосерд, вся прегрешения их вольныя и невольныя и скоро воздвигни от расслабления душевнаго и телесного, молимтися, услыши и милостивно помилуй.
Хор: Господи, помилуй (трижды).
Свящ. или дьякон: Езекиины слезы, Манасиино и ниневитян покаяние и Давидова исповедание приемый и скоро тех помиловавый, и наша во умилении приносимыя Тебе мольбы приими, Всеблагий Царю и, яко щедр, помилуй люте страждущих от недуга наркомании и пианства рабов Твоих, сродников и ближних наших, здравие и исцеление им даруя, со слезами молимтися, Источниче Жизни и Бессмертия, услыши и скоро помилуй.
Хор: Господи, помилуй (трижды).
Свящ. или дьякон: Еще молимся о еже не презрети прилежная моления матерей, слезы проливающих о чадех своих, жен честных, о мужех своих рыдающих, чад сирых и убогих, от пияниц и наркоманов оставленных и всех нас к Тебе припадающих и тепле просящих: да приидет сие моление наше и вопль наш о страждущих и погибающих сродниках наших к Престолу Владычествия Твоего и милостивно услышан будет, молимтися, услыши и помилуй.
Хор: Господи, помилуй (трижды).
Свящ. или дьякон: Еще молимся о всех сродниках и знаемых, поношение и скорбь от наркоманов и пианствующих терпящих, и о еже укрепи их в терпении, незлобии и прощении согрешающих и досаждающих им, молимтися, услыши и помилуй.
Хор: Господи, помилуй (трижды).
Возглас:
Услыши ны, Боже Спасителю наш, упование всех концев земли, и сущих в мори далече, и милостив, милостив буди, Владыко, о гресех наших, и помилуй ны: милостив бо и человеколюбец Бог еси, и тебе славу возсылаем, Отцу, и Сыну, и Святому духу, ныне и присно, и вовеки веков.
Лик: Аминь.
Молитва ко Пресвятей Богородице:
Царице моя преблагая, надеждо моя Богородице,
приятелище сирых и странных предстательница,
скорбящих радосте, обидимых покровительнице!
Зриши мою беду, зриши мою скорбь,
помози ми яко немощну, окорми мя яко странна.
Обиду мою веси, разреши ту, яко волиши:
яко не имам иныя помощи разве Тебе,
ни иныя предстательницы,
ни благия утешительницы, токмо Тебе, о Богомати,
яко да сохраниши мя и покрыеши во веки веков. Аминь.
Отпуст.

• Назад
• Вперёд